ឧត្តរមានជ័យ៖ពលរដ្ឋកម្ពុជានៅក្រុងសំរោង ខេត្តឧត្តរមានជ័យ បាននិយាយថា បណ្តាញអគ្គិសនីនៅក្នុងក្រុងមួយនេះ ត្រូវបានកាត់ផ្តាច់ទាំងស្រុងនៅល្ងាចម៉ោងប្រហែល ៦:៣០នាទីថ្ងៃអង្គារនេះខណៈទាហានថៃនៅបន្តផ្លោងគ្រាប់កាំភ្លើងធំយ៉ាងខ្លាំងក្លាចូលជ្រៅមកក្នុងទឹកដីកម្ពុជា។
គេនៅមិនទាន់បានដឹងពីមូលហេតុនៃការដាច់ចរន្តអគ្គិសនីនៅក្នុងខេត្តភាគពាយព្យនៃប្រទេសកម្ពុជានៅឡើយទេ ខណៈខេត្តនេះកំពុងស្ថិតនៅក្រោមការវាយប្រយុទ្ធគ្នារវាងទាហានកម្ពុជា និងថៃ អស់រយៈពេល ៥ថ្ងៃមកហើយ។ចរន្តអគ្គិសនីនៅក្រុងសំរោងនេះ ត្រូវបានតភ្ជាប់មកពីប្រទេសថៃ ហើយការកាត់ផ្តាច់ចរន្តថាមពលនេះ ត្រូវបានគេជឿថាធ្វើឡើងដោយភាគីថៃ ដែលកំពុងតែមានជម្លោះព្រំដែនយ៉ាងក្រពុលមុខជាមួយប្រទេសកម្ពុជា។
សាក្សីនៅជិតកន្លែងមានការប្រយុទ្ធគ្នា បានឲ្យដឹងថា ស្នូរកាំភ្លើងធំបានផ្ទុះលាន់កក្រើកដល់ក្រុងសំរោង ដែលនោះគឺជាសញ្ញានៃការផ្លោងយ៉ាងជញ្ច្រាំនូវគ្រាប់កាំភ្លើងធំធុន ១៥៥មីល្លីម៉ែត្ររបស់ថៃ មកលើទឹកដីកម្ពុជា។
ទាហានកម្ពុជា និងថៃ បានវាយប្រយុទ្ធគ្នាអស់រយៈពេល ៥ថ្ងៃមកហើយ ចាប់តាំងពីថ្ងៃសុក្រសប្តាហ៍មុន នៅតំបន់ព្រំដែនព្រៃភ្នំ ភាគពាយព្យប្រទេសកម្ពុជា ហើយការវាយប្រយុទ្ធគ្នាក៏បានរាលដាលដល់តំបន់ព្រំដែនជិតប្រាសាទព្រះវិហារផងដែរ ជាទីដែលធ្លាប់មានការប្រយុទ្ធគ្នាយ៉ាងបង្ហូរឈាមកាលពីខែកុម្ភៈកន្លងមក។
យ៉ាងហោចណាស់មនុស្ស ១៣នាក់ នៃភាគីទាំងសងខាង ត្រូវបានសម្លាប់នៅក្នុងការវាយប្រយុទ្ធគ្នាដ៏បង្ហូរឈាមនេះ ខណៈរាប់សិបនាក់ទៀតរងរបួស និងបង្ខំឲ្យពលរដ្ឋរាប់ពាន់គ្រួសារនៃប្រទេសទាំងពីរ បានជម្លៀសចេញពីបរិវេណមានការប្រយុទ្ធគ្នា ទៅកាន់ជំរំសុវត្ថិភាព៕
No comments:
Post a Comment