យោងតាមមន្ត្រីរដ្ឋបាលជាន់ខ្ពស់ម្នាក់ ដែលថ្លែងក្នុងលក្ខខណ្ឌអានាមិក បានឲ្យដឹងថា នៅក្នុងកិច្ចប្រជុំ ២ម៉ោងនោះនៅឯបន្ទប់ពិសេសមួយក្នុងសេតវិមាន ហៅថា បន្ទប់តាមដានស្ថានការណ៍ ក្រុមអ្នកចូលរួមប្រជុំបានពិភាក្សាគ្នាអំពីគុណសម្បត្តិ និងគុណវិបត្តិ នៃការវាយឆ្មក់លើបរិវេណគេហដ្ឋាននោះ ពីសំណាក់ក្រុមទាហានឆ្នើមអាមេរិកមួយក្រុមតូច។
មន្ត្រីដដែលនេះ បាននិយាយថា ជម្រើស ២ទៀត គឺត្រូវធ្វើការវាយប្រហារ ឬក៏ត្រូវរង់ចាំព័ត៌មាន ដែលអាចផ្តល់នូវភាពជាក់លាក់កាន់តែច្បាស់ថា តើមេដឹកនាំក្រុមអាល់កៃដារូបនេះ ពិតជាកំពុងលាក់ខ្លួននៅក្នុងគេហដ្ឋានដូចបន្ទាយទាហាន នៅខាងក្រៅក្រុងអ៊ីស្លាម៉ាបាដមែន ឬយ៉ាងណា។
មន្ត្រីនេះនិយាយបន្ថែមថា ក្រុមទីប្រឹក្សារបស់លោក អូបាម៉ា បានបំបែកគ្នានៅកិច្ចប្រជុំនាថ្ងៃព្រហស្បតិ៍សប្តាហ៍មុន ហើយលោកប្រធានាធិបតី បានចំណាយពេលមួយយប់ដើម្បីគិតពិចារណាលើការសម្រេចចិត្តនេះ។
នៅព្រឹកថ្ងៃសុក្រ មុននឹងចាកចេញទៅទស្សនារដ្ឋអាឡាបាម៉ា ដែលរងគ្រោះដោយខ្យល់ព្យុះ លោក អូបាម៉ា បានលាតត្រដាងបានក្រុមជំនួយការរបស់គាត់តូចមួយថា គាត់បានសម្រេចចិត្តគាំទ្រការវាយឆ្មក់ភ្លាមៗមួយ។
ខណៈពេលគាត់ចេញបញ្ជាឲ្យធ្វើប្រតិបត្តិការ ដែលនាំទៅដល់ការសម្លាប់មេខ្លោងនៃការវាយប្រហារថ្ងៃទី១១ កញ្ញា ឆ្នាំ២០០១ លើសហរដ្ឋអាមេរិកនោះ លោក អូបាម៉ា បាននិយាយប្រាប់ទីប្រឹក្សារបស់គាត់ថា៖ «វាជាការចេញដំណើរមួយ»។
ព័ត៌មានស្តីពីគេហដ្ឋាននៅសង្កាត់អាប់បូតតាបាដ បានលេចចេញឡើងកាលពីខែសីហារឆ្នាំមុន ប៉ុន្តែ វាបានអូសបន្លាយរហូតទៅដល់ខែមីនាឆ្នាំនេះ ដែលក្រុមមន្ត្រីអាមេរិកមានជំនឿថា មានព័ត៌មានគ្រប់គ្រាន់អាចបញ្ចុះបញ្ជូលឲ្យលោកប្រធានាធិបតីជឿជាក់បាន ហើយពួកគេចាប់ផ្តើមគិតគូរអំពីជម្រើសសម្រាប់ឆ្លើយតបនឹងព័ត៌មាននេះ។
ក្រុមអ្នកវិភាគព័ត៌មានសម្ងាត់អាមេរិក បានតាមដានលើរឿងសាំញ៉ាំនេះរហូតមក ដោយសង្កេតឃើញថា មានគេហដ្ឋានតម្លៃ ១លានដុល្លារមួយនៅទីនោះ កាន់កាប់ដោយមនុស្សម្នាក់ដែលមិនមានប្រភពចំណូលច្បាស់លាស់។ តាមមន្ត្រីដដែលនេះ បានឲ្យដឹងថា គ្រួសារមួយក៏ហាក់រស់នៅទីនោះដែរ ក្នុងនោះមានទាំងបុរសម្នាក់ ដែលមិនដែលចាកចេញពីដីឡូតិ៍នោះ។
គ្មាននរណាដឹងប្រាកដ
គ្រួសារនោះហាក់សាកសមនឹងគ្រួសាររបស់ ប៊ីនឡាដិន។ នៅតែរហូតដល់ចុងបញ្ចប់ គ្មាននរណាម្នាក់នៅក្នុងរដ្ឋបាលលោក អូបាម៉ា ក្នុងនោះមានទាំងលោកប្រធានាធិបតីអាមេរិក ដឹងច្បាស់នោះឡើយ។
ការពិភាក្សាជុំវិញអ្វីដែលពិតជាបានកើតឡើងនៅអំឡុងពេលប៉ុន្មានសប្តាហ៍ក្នុងកិច្ចប្រជុំនានា ដែលត្រូវបានគេរៀបចំឡើងយ៉ាងសម្ងាត់បំផុតនោះ គ្មានអ្នកថតរូបណាម្នាក់ មានវត្តមាននៅក្នុងកិច្ចប្រជុំនោះឡើយ ហើយកិច្ចប្រជុំត្រូវបានគេផ្តល់តែប្រធានបទតែប៉ុណ្ណោះ។
ដោយសារតែបានដឹងថា មនុស្សម្នាក់ដែលនៅតែក្នុងផ្ទះមិនចេញទៅណានោះ ជា ប៊ីនឡាដិន សម្ពាធឲ្យចាត់ការជាបន្ទាន់លើជនសង្ស័យនោះ បានរសាយខ្លះ។
មន្ត្រីនោះនិយាយទៀតថា លោក អូបាម៉ា និងជំនួយការរបស់គាត់ ព្រួយបារម្ភថា ការពន្យាពេលធ្វើសកម្មភាពយូរពេក នឹងបង្កឲ្យមានគ្រោះថ្នាក់ខ្ពស់ ដែលសម្តីរបស់អ្នកតាមឃ្លាំមើលដោយសម្ងាត់ អាចនឹងលេចធ្លាយចេញ ហើយគោលដៅតាមប្រមាញ់របស់ពួកគេនោះ អាចគេចខ្លួនចេញ។
ការចេញបញ្ជារបស់លោក អូបាម៉ា ឲ្យមានការវាយឆ្មក់កាលពីថ្ងៃសុក្រនេះ ត្រូវបានជំរុញដោយសារមានក្តីបារម្ភមួយផ្នែក។ ម្យ៉ាងទៀត តួនាទីមួយក្នុងការកំណត់ពេលវេលានេះ គឺជាការពិតបញ្ជាក់ថា ក្រុមទាហានជើងទឹកអាមេរិក បានអនុវត្តនូវសមយុទ្ធសម្រាប់ធ្វើប្រតិបត្តិការជាច្រើនលើក ហើយបានរក្សាការត្រៀមខ្លួនរួចជាស្រេចដើម្បីរង់ចាំតែបញ្ជារបស់មេបញ្ជាការ។
នៅរសៀលថ្ងៃអាទិត្យចុងសប្តាហ៍ លោក អូបាម៉ា បានកោះប្រជុំមួយនៅសេតវិមាន ជាទីដែលបរិយាកាសឡើងតឹងតែងមែនទែន ហើយពោរពេញទៅដោយក្តីកង្វល់ ខណៈក្រុមអ្នកចូលរួមប្រជុំទាំងនោះបានតាមដានប្រតិបត្តិការផ្ការីកនេះនៅតាមកញ្ចក់ទូរទស្សន៍។
អ្នកដែលមានវត្តមាននៅពេលនោះ មានទាំងរដ្ឋមន្ត្រីការបរទេសអាមេរិក ហ៊ីឡារី គ្លីនតុន រដ្ឋមន្ត្រីការពារជាតិ រ៉ូបឺត ហ្គេតស៍ ទីប្រឹក្សាសន្តិសុខជាតិរបស់សេតវិមាន ថូម ដូនីឡុន និងទីប្រឹក្សាប្រឆាំងអំពើភេរវកម្ម ចន ប្រេនណាន់។
លោក អូបាម៉ា និយាយនៅក្នុងសម្តីប្រតិកម្មទៅនឹងដំណឹងស្តីពីការស្លាប់របស់ ប៊ីនឡាដិន ថា៖ «យើងចាប់វាបានហើយ»៕
No comments:
Post a Comment